ಏಕ್ ನದರ್ ಸಾಂ. ಪಾತ್ರಿಸಾಕ್ ಸಮರ್ಪಿಲ್ಲ್ಯಾ ಸಿದ್ಧಕಟ್ಟೆ ಫಿರ್ಗಜಿಚೆರ್
History of Our Parish
ಮಂಗ್ಳುರ್ಚ್ಯಾ ಉದೆಂತಿ ಕುಶಿಕ್ ಆಸ್ಚಾ ಆಮ್ಚಾ ಸಿದ್ಧಕಟ್ಟೆ ಫಿರ್ಗಜೆಂತ್ ಕ್ರೀಸ್ತಾಂವ್ಪಣ್ ಸರಾಸರ್ 19ವ್ಯಾ ಶತಮಾನಾಚ್ಯಾ ಸುರ್ವೆರ್ಚ್ಚ್ ಆಸ್ಲೆಲೆಂ ಮ್ಹಣ್ಯೆತ್. ತವಳ್ ಆಮ್ಚೆಂ ಸಿದ್ಧಕಟ್ಟೆ, ಆಗ್ರಾರ್-ಪೊಣೆಗೊಲ್ ಫಿರ್ಗಜೆಚೊ ಏಕ್ ವಾಂಟೊ ಜಾವ್ನಾಸ್ಲ್ಲೆಂ. (18ವ್ಯಾ ಶತಮಾನಾಂತ್ ಆಮ್ಚೆ ಮಾಲ್ಘಡೆ ಹ್ಯಾ ಕುಶಿಕ್ ಬ್ರಾಹ್ಮಣ್, ಬಂಟ್ ಆನಿ ಜೈನಾಂಚೆ ಜಾಗೆ ಚಾಲ್-ಗೇಣಿಕ್ ಘೆವ್ನ್ ಸಾಗ್ವಳಿ ಕರ್ನ್ ಧನಿಯಾಂಕ್ ಪೊಸ್ತಾಲೆ).
ತವಳ್ ಆಮ್ಚಿಂ ಮಾಲ್ಘಡಿಂ ಆಗ್ರಾರ್ ಫಿರ್ಗಜ್ಗಾರಾಂ ಜಾಲ್ಲ್ಯಾ ನಿಮ್ತಿಂ, ತಾಂಚ್ಯಾ ಅತ್ಮೀಕ್ ಗರ್ಜಾಂಕ್, ಭುತಿ ಘೆವ್ನ್ ಪಾಂಯ್ ವಾಟೆನ್ ಆಗ್ರಾರ್ ಚಲೊನ್ ವೆತಾಲಿಂ; ಕಿತ್ಯಾಕ್ ತ್ಯಾ ಕಾಳಾರ್ ಕುಮ್ಗಾರ್ ಸೆಂವ್ಕ್, ಲಾಂಬ್ ಉಪ್ವಾಸ್ ಕರಿಜಾಯ್ ಆಸ್ಲೊ. ಹ್ಯಾ ಆವ್ದೆರ್ ಆಗ್ರಾರ್ ಫಿರ್ಗಜೆಚೊ ವಿಗಾರ್-ಜೆರಾಲ್ ಜಾವ್ನಾಸ್ಲೆಲ್ಯಾ, ಪ್ರಸ್ತುತ್ ‘ದೆವಾಚೊ ಸೆವಕ್’ ಮ್ಹಣ್ ಪಾಚರ್ಲೊಲೊ ಅ| ಮಾ| ಬಾ| ಆರ್.ಎಫ್.ಸಿ. ಮಸ್ಕರೇನ್ಹಸ್ (ಬೆಥನಿ ಮೆಳಾಚೊ ಘಡ್ಣಾರ್) ಹಾಣೆಂ ಪ್ರಸ್ತುತ್ ಸಿದ್ಧಕಟ್ಟೆ ಇಗರ್ಜೆಚೊ 12 ಎಕ್ರೆ ಜಾಗೊ ಸರ್ಕಾರಾ ಥಾವ್ನ್ ಮಂಜೂರ್ ಕರಯ್ಲೊ. ಪುಣ್ ತ್ಯಾ ವೆಳಾರ್ ಆಗ್ರಾರ್ ಫಿರ್ಗಜೆಚ್ಯಾ ರಾಯಿ, ಕೊಯಿಲ, ಕರ್ಪೆ ಆನಿ ಕಣಿಯೂರ್ ವಾಡ್ಯಾಂಕ್ ನವೆಂ ಕೊಪೆಲ್ ರಾಯಿ ಥಾವ್ನ್ 2 ಕಿ.ಮೀ. ಪಯ್ಸ್ ಎಲ್ಪೆಲ್ ಪದ್ವಾರ್ ಮ್ಹಣ್ ನಿರ್ಣಯ್ ಕೆಲೊ. ಹಿ ಗಜಾಲ್ ಕಳೊನ್ ಸರ್ಕಾರಿ ಅಧಿಕಾರಿಂನಿ ಸಿದ್ಧಕಟ್ಟೆಂತ್ ಇಗರ್ಜ್ ಬಾಂಧಿನಾಂತ್ ತರ್ 12 ಎಕ್ರೊ ಜಾಗೊ ರದ್ದ್ ಕರ್ತಾಂವ್ ಮ್ಹಣ್ ಭೆಷ್ಟಾಯ್ಲೆಂ. ಹಾಂಗಾ ಥಾವ್ನ್ ಸಿದ್ಧಕಟ್ಟೆಂತ್ ಏಕ್ ನವೆಂ ಸ್ವಪಾಣ್ ಉದೆಲೆಂ.
ಉದ್ಕಾಚಿ ವ್ಯವಸ್ಥಾ ನಾತ್ಲೆಲ್ಯಾ ಹ್ಯಾ ಉಬಾರ್ ಸುವಾತೆರ್, ಇಗರ್ಜ್ ಭಾಂದ್ಚೆಂ ಕಾಮ್ ಆಗ್ರಾರ್ಚೊ ವಿಗಾರ್ ಮಾ| ಬಾ| ರೆಜಿನಾಲ್ಡ್ ಪಿಂಟೊನ್ 1924 ಇಸ್ವೆಂತ್ ಸುರ್ವಾತ್ಲೆಂ. ಲೊಕಾಚ್ಯಾ ಸ್ವ ಮ್ಹಿನತೆನ್ 1925 ಇಸ್ವೆಂತ್ ಐರ್ಲೆಂಡಾಚೊ ಧರ್ಮ್ ಪ್ರಚಾರಕ್ ಸಾಂ ಪಾತ್ರಿಸಾಚ್ಯಾ ಮಾನಾಕ್ ಸಮರ್ಪಿಲ್ಲೆಂ ದೇವ್ ತೇಂಪ್ಲ್ ಉಭೆಂ ಜಾಲೆಂ. ಹೆಂ ಅಜೂನ್ ಮಂಗ್ಳುರ್ ದಿಯೆಸೆಜಿಂತ್ ಸಾಂ ಪಾತ್ರಿಸಾಕ್ ಸಮರ್ಪಿಲ್ಲೆಂ ಏಕ್ ಮಾತ್ರ್ ದೇವ್ ಮಂದಿರ್ ಜಾವ್ನ್ಂಚ್ ಉರ್ಲಾಂ.
1925ವೆರ್ ನವ್ಯಾ ಕೊಪೆಲಾಚೆಂ ಉಗ್ತಾವಣ್ ಮಂಗ್ಳುರ್ ಮಿಸಾಂವ್ ಕ್ಷೇತ್ರಾಚೊ ವ್ಹಡಿಲ್ ಜಾವ್ನಾಸ್ಲ್ಲ್ಯಾ ಮಾ| ಜಿ. ಡಿ. ಆಲ್ಬರ್ಟ್ (ಜೆ.ಸ.) ಬಾಪಾನ್ ಕೆಲೆಂ. (ಹೆಂ ಆತಾಂಚ್ಯಾ ಇಗರ್ಜೆ ಪಾಟ್ಲ್ಯಾನ್ ಆಸ್ಲ್ಲೆಂ) ಉಪ್ರಾಂತ್ ಮಂಗ್ಳುರ್ ದಿಯೆಸೆಜಿಚೊ ಆಪೊಸ್ತಲಿಕ್ ಆಡಳ್ತೆದಾರ್ ಜಾವ್ನಾಸ್ಲ್ಲ್ಯಾ ಭಿಸ್ಪ್ ಅ|ಮಾ|ದೊ|ಪಾವ್ಲ್ ಪೆರಿನಿ ಹಾಣಿಂ 10 ಎಪ್ರಿಲ್ 1926ವೆರ್ ಸಿದ್ಧಕಟ್ಟೆ ಫಿರ್ಗಜ್ ಅಧಿಕೃತ್ ಮ್ಹಣ್ ಮಾನುನ್ ಘೆತ್ಲಿ. ಪಯ್ಲೊ ವಿಗಾರ್ ಜಾವ್ನ್ ಮಾ|ಬಾ| ಲುವಿಸ್ ಜೆ. ಸಿಲ್ವಾಕ್ ನೇಮಕ್ ಕೆಲೊ (01-05-1926). ತ್ಯಾ ದಿಸಾ ಥಾವ್ನ್ ಆರಂಭ್ ಜಾಲಿ ಜಿಣಿ ಆಮ್ಚ್ಯಾ ಫಿರ್ಗಜೆಚ್ಯಾ ಪ್ರಗತೆಚಿ ಚರಿತ್ರಾ.
1926 ಇಸ್ವೆಂತ್ ನಿರ್ಣಯ್ ಜಾಲ್ಲ್ಯೊ ಆಮ್ಚ್ಯಾ ಫಿರ್ಗಜೆಚ್ಯೊ ಗಡಿ ಹ್ಯೆ ಪ್ರಕಾರ್ :
ಆಗ್ರಾರ್ ಫಿರ್ಗಜೆಚೆ ರಾಯಿ, ಕೊಯಿಲ, ಕರ್ಪೆ, ಕಣಿಯೂರು (4 ವಾಡೆ), ತಾಕೊಡೆ ಫಿರ್ಗಜೆಚೆ ಸಂಗಬೆಟ್ಟು ಆನಿ ಎಲಿಯನಡುಗೋಡು. ಅಶೆಂ ಒಟ್ಟು 6 ವಾಡೆ ಮೆಳಯ್ಲೆ. ತೆದ್ನಾಂ ಹ್ಯಾ ಫಿರ್ಗಜೆಂತ್ 107 ಕುಟ್ಮಾಂ ಆಸೊನ್, 685 ಕ್ರೀಸ್ತಾಂವ್ ಲೋಕ್ ಆಸ್ಲ್ಲೊ.
ಪಯ್ಲೊ ವಿಗಾರ್ ಸಿಲ್ವಾ ಬಾಪಾಂನಿ ಕುಕ್ಕಿಪಾಡಿ ಆನಿ ಸಿದ್ಧಕಟ್ಟೆಂತ್ ದೋನ್ ಶಾಳಾಂ ಸ್ಥಾಪನ್ ಕೆಲಿಂ. ವಿಗಾರಾಕ್ ರಾವೊಂಕ್ ಏಕ್ ಘರ್ (ಉಜ್ವ್ಯಾಕ್ ಆಸ್ಚೆಂ) ಆನಿ ರಸ್ತ್ಯಾ ದೆಗೆನ್ ಆಂಗ್ಡಿ ಸಾಲ್ಯೀ ಭಾಂದಯ್ಲೆಂ (1968ಂತ್ ಹುಲ್ಪಾಲ್ಲೆಂ). ತ್ಯಾ ವೆಳಾರ್ ದಿಯೆಸೆಜಿ ಥಾವ್ನ್ ಧಾ ರುಪಯ್, ಆಗ್ರಾರ್ ಫಿರ್ಗಜೆ ಥಾವ್ನ್ ವೀಸ್ ರುಪಯ್ ಆನಿ 36 ಮುಡೆ ತಾಂದುಳ್ ಮೆಳ್ತಾಲೊ. ಅಶೆಂ ಭೋವ್ಚ್ಚ್ ನಾಜೂಕಾಯೆನ್ ಫಿರ್ಗಜೆಚೊ ಖರ್ಚ್ ಚಲ್ತಾಲೊ.
ಪ್ರಸ್ತುತ್ ಮಾ| ಬಾ| ಡೇನಿಯಲ್ ಡಿಸೋಜಾ, ವಿಗಾರ್ ಜಾವ್ನ್ ಫಿರ್ಗಜೆಂತ್ ಆತ್ಮೀಕ್ ವಾಡಾವಳೆಚೆ ಸವೆಂ, ಫಿರ್ಗಜ್ ಅಭಿವೃದ್ಧೆಕ್ ಆಪ್ಲಿ ಪ್ರಾಮಾಣಿಕ್ ಸೆವಾ ದೀವ್ನ್ಂಚ್ ಆಸಾತ್. ಪಾಟ್ಲ್ಯಾ 9೮ ವರ್ಸಾಂನಿ ಆಮ್ಕಾಂ ಸಾಂಬಾಳ್ನ್ ಧರ್ಲೆಲ್ಯಾ ಕ್ರೀಸ್ತಾಕ್ ಜಾಂವ್ ಹೊಗ್ಳಾಪ್. ಕ್ರೀಸ್ತಾಚ್ಯಾ ಮೆಟಾಂನಿ ಆಮ್ಚಿ ಚರಿತ್ರಾ ಫುಡೆಂ ವಚೊಂ ಮ್ಹಣ್ ಆಶೆವ್ಯಾಂ. ಆಮ್ಚ್ಯಾ ಮಾಲ್ಘಡ್ಯಾಂಚೊ ಭಾವಾರ್ಥ್, ವಾವ್ರ್ ಆಮಿಂಯೀ ಸಾಂಬಾಳ್ನ್ ಧರುಂಯಾo.
******